ප්‍රසිඩන්ට් තෝරන සුපර් ස්ටාර් ළඟදීම සිනමාහල්වල

මෙම අපේක්ෂකයෝ තිදෙනා කලාව, අධ්‍යාපනය, නීතිය, ජනමාධ්‍ය, ජාතිවාදය, ත්‍රස්තවාදය, පාතාලය නැති කළ හැකි ක්‍රමවේද , බලය ලබා ගැනීමට අනුගමනය කළ යුතු ක්‍රියාමාර්ග පිළිබඳව විවිධ අදහස් ඉදිරිපත් කරති. මෙම අදහස් ප්‍රකාශ කිරීම් වරෙක උත්වේගකරය. තවත් වරෙක හාස්‍යජනකය, තම අදහස් තහවුරු කිරීම සඳහා ඔවුහු වරින්වර වේදිකාව මත විවිධ ප්‍රසංගයන් ඉදිරිපත් කරති. ජාතිය පිළිබඳ කතිකාවේ දී සිංහයෙකු සමඟ කෙරෙන සංවාදය, පාතාලය පිළිබඳ කතිකාවේදී පාතාල නායකයෙකුගෙන් අදහස් විමසීම, මෙන්ම හිට්ලර් , මැන්ඩෙලා වැනි විවිධ ජන නායකයින් ද වරින් වර වේදිකාවට ගොඩ වෙති . නරඹන්නන් මෙන්ම ප්‍රේක්ෂකයින් ද විවිධ හැඟීම් ප්‍රකාශ කරති.

රටේ බොහෝ ජනතාව මෙම අපුර්ව වැඩසටහන නැරඹීමට පෙළ ගැසෙති. මෙය නිර්මාණය කළ රූපවාහිනී ආයතනයේ ප්‍රධානී කැළුම් රත්නායකට විවිධ අභියෝගයන්ට මුහුණ දීමට සිදු වේ. බාධක රැසක් මැද ඔහු තරඟය අවසානය දක්වා රැගෙන යයි.

මේ සියලු සිදුවීම් සහ චරිත ඔබට හමුවන, උදයකාන්ත වර්ණසූරිය අධ්‍යක්ෂණය කළ අපූරු ප්‍රහසනාත්මක සිනමාපටය “ප්‍රසිඩන්ට් සුපර් ස්ටාර්” ඔක්තෝබර් 25 වැනිදා සිට දිවයින පුරා සිනමාහල් වලදී ඔබට නැරඹිය හැකියි.