Sri Lanka's Best Cinema Portal

 

රිදී තිරයට සරසවිය, වරම් දෙයි යළිත්…..

0
Posted June 25, 2018 by Nisanka Weheraduwa in Articles
Sarasaviya Award Ceremony Logo

 

සරසවි සම්මාන උළෙල ශ්‍රී ලාංකීය සිනමාවේ නිර්මාණ සහ ශිල්පින් අගය කිරීමේ අරමුණින් යුතුව මුලින්ම ආරම්භ වන්නේ 1964 වසරේදී. හරියටම මිට වසර 54කට පෙරදී. අඛණ්ඩව පවත්වා ගැනීමට නොහැකි ප්‍රායෝගික ගැටළු රැසක් හේතුවෙන් යම් යම් අවස්ථාවන්හි පසුබෑමට ලක් වුනත්, සරසවි සම්මාන උළෙල 33 වතාවක් පැවැත්වීමට “සරසවිය”ට හැකියාව ලැබී තිබෙනවා. මෙවර යළිත් සරසවි සම්මාන උළෙල පැවැත්වීමට දැන් සියළු කටයුතු සුදානම්. මේ සුබ ආරංචිය නිවේදනය කරන මාධ්‍ය හමුවක් පසුගියදා පැවැත්වුනා.

සරසවි සම්මාන උළෙල එදා පටන්ම හැඳින්වුයේ දේශීය සිනමාවේ මහා කලා මංගල්‍ය නමින්. දේශීය සිනමාවේ ආරම්භයේ පටන් පැවතුනු සිනමා සම්මාන උළෙල වන නිසාම ඒ සම්මානයට විශේෂ වටිනාකමක් සහ බරක් එක්ව තිබුනා. දේශීය සිනමාවේ නියැලෙන ශිල්පින් තුළ “සරසවි” සම්මානයක් යන්න බලාපොරොත්තුවක් සහ සිහිනයක්ව තිබුනා. ඒ සිහිනය දිගින් දිගටම පවත්වා ගනිමින් දේශීය සිනමාවේ හෙට දවසට උරදීමේ අරමුණින් මෙවර සරසවි සම්මාන උළෙල සඳහා Cargills සමාගම අත්වැල් බැඳගන්නවා. අගෝස්තු මස 03 වැනිදා බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී මෙම සිනමා සම්මාන උළෙල පැවැත්වීමට කටයුතු යොදා තිබෙනවා. 2016 සහ 2017 වසරේ තිරගත වුනු චිත්‍රපට සඳහා මෙවර ඇගයීම් සම්මාන ප්‍රධානය සිදු කෙරෙනවා.

2016 වසරේ තිරගත වුනු චිත්‍රපට අතරින් 25ක් අතරින්  25ක් සහ 2017 වසරේ තිරගත වුනු චිත්‍රපට 26ක් මෙලෙස ඇගයීම් සඳහා සලකා බැලෙනවා. සම්මාන උළෙලේ පිරිනැමෙන තරඟකාරී අංශයේ සම්මාන ප්‍රමාණය 24ක් වනවා. ඒ අනුව වසර දෙක සඳහා වෙන වෙනම සම්මාන 48ක් තරගකාරී අංශය වෙනුවෙන් පිරිනැමීමට උළෙලේ ජුරිය විසින් තෝරා ගැනෙනු ඇති. ඉතා මෑතකදී සරසවි සම්මාන උළෙලට හඳුන්වා දුන් “ආචාර්ය ලෙස්ටර් ජේමිස් පිරිස් සම්මානය” සඳහාද වසර දෙක වෙනුවෙන් වෙන වෙනම සිනමාපට සලකා බලෙන බවත් පැවසෙනවා. ප්‍රසිද්ද රැඟුම් පාලක මණ්ඩලය මගින් අනුමත කළ එහෙත් තවමත් තිරගත නොවුණු අලුත් සිනමා කරුවන්ගේ “ප්‍රථම නිර්මාණය” (Debut film) මෙම සම්මානය සඳහා සුදුසුකම් ලබනවා. එයත් අදාළ වර්ෂ දෙකට අනුව වෙන වෙනම ඇගයීමට ලක්කෙරෙනු ඇති.

ජනප්‍රිය සම්මාන කාණ්ඩය මෙරට සම්මාන ක්ෂේත්‍රයට හඳුන්වා දුන් සරසවි සම්මාන උළෙල මෙවරත් වසර ද්විත්වය සඳහා වෙන වෙනම ජනප්‍රියම ශිල්පින් තෝරා ගැනීමට සැලසුම් කොට තිබෙනවා. එය තෝරාගනු ලබන්නේ ප්‍රේක්ෂක මනාපයට අනුව වීමත් සුවිශේෂියි. ජනප්‍රියම සිනමාපටය ලෙස සම්මානයට හිමිකම් කියන්නේ වසරේ වැඩිම ආදායම් ලැබූ චිත්‍රපටයයි.

සිනමාව වෙනුවෙන් ජීවිතය පුරා සිදුකරන උදාරතර කැපකිරීම උදෙසා වන රණ තිසර යාවජීව සම්මානයද මෙවරත් පිරිනැමෙනවා. මේ අනුව සිනමාපට 49ක් සඳහා සම්මාන 60කට අධික සංඛ්‍යාවක් පිරිනැමීමට සරසවි සම්මාන උළෙල සුදානම්. අගෝස්තු මස 3 වැනිදා BMICH හිදී මෙවර විශිෂ්ටයින් අභිෂේක ගැන්වීම සිදු කෙරෙනවා.

 

Share

About the Author

Nisanka Weheraduwa


 
Popular
 
  • 11054457_1409705939357865_5822327755300679673_n
  • 10350634_880714251944840_8448217158647864537_n
  • spring depart
  • 598556_431654790279257_1742531492_n [1024x768]
  • madras-cafe-4a
  • aba and coba
  • 174_2
  • mahin2