Rider (රයිඩර්) පූර්ව ප්‍රචාරකපටය නරඹන්න

ලාංකීය සිනමාවට එක්වීමට නියමිත නවතම Action – Thriller වෘතාන්ත සිනමාපටයක් තමයි “රයිඩර්” (Rider) නමින් හැඳින්වෙන්නේ. ජනප්‍රිය නලු නිළියන් රැසක් රංගනයෙන් එක්වන එහි නිල පූර්ව ප්‍රචාරක පටය දැන් අන්තර්ජාලයට නිකුත් කොට තිබෙනවා.

මෙරට තාරුණ්‍යය අතරෙ හි ජනප්‍රිය නලුවෙකු වන රොශාන් රණවන විසින් ප්‍රධාන චරිතය රඟපාන මෙම “රයිඩර්” (Rider) සිනමාපටය නුදුරු දිනකදීම දිවයින පුරා සිනමාහල්වලට නිකුත් වීමටත් නියමිතයි. ක්‍රියාදාම ශානරයේ චිත්‍රපටයක් වන එහි සටන් ජවනිකා මෙන්ම ත්‍රාසය – ආදරයත් ගැබ්ව තිබෙනවා.

සදේශ් නැමැති විශ්ව විද්‍යාල ශිෂ්‍යයාගේ චරිතයයි රොශාන් රණවන විසින් මෙහිදී නිරූපණය කරන්නේ. විශ්ව විද්‍යාල දේශපාලනයට එකතු වූ ශිෂ්‍ය ක්‍රියාධරයෙකු වන සදේශ්ට, තමන් නොකළ වැරැද්දකට සිරගත වන්නට සිදුවනවා. එතැන් පටන් ඔහුට නොසිතූ සිදුවීම් ගණනාවකට මුහුණ දීමට වන අතර පාතාලය සහ පොලිසිය සමඟින් ගනුදෙනු කරන්නටත් ඔහුට සිදුවනවා.
“රයිඩර්” (Rider) චිත්‍රපටයෙන් දිග හැරෙන්නේ පාතලය සහ ලාංකීය අඳුරු දේශපාලකයින් සමඟ සදේශ්ගේ එම ගනුදෙනුවයි.

පහත සබැඳිය ඔස්සේ ඔබට “රයිඩර්” (Rider) සිංහල චිත්‍රපටයේ නිල පූර්ව ප්‍රචාරකපටය රස විඳිය හැකියි.

චිත්‍රපටයේ කතාව – දෙබස් – තිර පිටපත රචනා කර තිබෙන්නේ රජිත හිරාන් විසිනුයි. එමෙන්ම “රයිඩර්” (Rider) සිනමාපටයේ අධ්‍යක්ෂකවරයා වන්නේ ද ඔහුයි. සොමි බෝයිස්, සැපට දුකට සනී, රෑ ඩැනියෙල් දවල් මිගෙල් වැනි නිර්මාණ හරහා හාස්‍ය රංගන ශිල්පියෙකු වශයෙන් ජනප්‍රියත්වයට පත් වූ රජිත හිරාන් දිගු වෘතාන්ත සිනමාපටයක් අධ්‍යක්ෂණය කරන පළමු අවස්ථාව මෙය බවත් පැවසෙනවා.

2000 මුල් දශකයේදී හිරිපොද වැස්ස, තාරකා මල් ආදී චිත්‍රපට තුළින් සිනමාවට පිවිසෙන රොශාන් රණවන ප්‍රේමවන්තයාගේ චරිතය හරහා මෙරට රසික රසිකාවියන්ගේ අසීමිත ආදරයට පාත්‍ර වුනා. ඉන්පසුව ඔහු රඟපෑ ආසයි මන් පියාඹන්න, රෝස කැලේ, සුවඳ දැනුනා ජීවිතේ වැනි චිත්‍රපට තුළින් මෙරට සිටින ජනප්‍රියතම නලුවන් කිහිප දෙනාට එකතුවීමටත් ඔහුට හැකියාව ලැබුනා. 2007 වසරේ ජනාධිපති සම්මාන උළෙලේදී හොඳම නැඟී එන සිනමා නලුවාට හිමි සම්මානය හිමි වූයේත් රොශාන් රණවනටයි.
මේ වනවිට ශ්‍රී සිද්ධාර්ථ ගෞතම, මහින්දාගමනය, උලත් එකයි පිලත් එකයි, ගෝරි, ෆේස් ටු ෆේස් වැනි සිනමා නිර්මාණ 20කට ආසන්න ප්‍රමාණයකට ඔහු රංගන දායකත්වය ලබාදී තිබෙනවා. රොශාන් රණවන රඟපෑ ‘නිමි’ සහ ‘රුහිරේ’ සිනමාපට ද්විත්වයත් පසුගිය දිනවල සාර්ථකව තිරගත වූවා.

රයිඩර් (Rider) චිත්‍රපටයේ ඔහුට අමතරව අනුජ් රණසිංහ, සරත් දික්කුඹුර, රජිත හිරාන්, චිලී තිවංක, සරත් කුලාංග වැනි ලාංකීය සිනමාවේ ජනකාන්ත නලු නිළියන් ගණනාවක්ම රංගනයෙන් දායක වනවා. ප්‍රවීණ රංගධරයෙකු වන සනත් ගුණතිලක ද රයිඩර් (Rider) හි උපප්‍රධාන චරිතයකින් ඔබට දැකගත හැකියි.

Indunil Creations වෙනුවෙන් මෙම සිනමාපටය නිෂ්පාදනය කරන්නේ මෙරට ප්‍රසිද්ධ උපකාරක පංති ගුරුවරයෙකු වන අනුෂ්ක ඉඳුනිල් විසිනුයි. ඔහුද චිත්‍රපටයේ එක් චරිතයක් සඳහා රංගන දායකත්වය ලබා දෙනවා.

සුජිත් නිශාන්තගේ කැමරා අධ්‍යක්ෂණයෙන් හැඩ වූ මෙහි සංස්කරණය තනුෂ්ක කහඳවලගෙනි. සංස්කරණයට අමතරව ශබ්ද සැලසුම් සහ වර්ණ සංයෝජනය සිදු කළේ ද ඔහුයි. සුරේශ් කුමාරසිංහ රයිඩර් චිත්‍රපටයට සහාය අධ්‍යක්ෂණයෙන් එක්ව තිබෙනවා. ශබ්ද සංයෝජනය සශින් ගිම්හාන් පෙරේරායි. කලා අධ්‍යක්ෂණය සුනෙත් නන්දලාල් සහ නිෂ්පාදන කළමනාකරණය ලෝචන සෙනෙවිරත්නයි.
හේශාන් කුරුප්පු, චාමික සමරසිංහ සහ සසිඳු දිලුරංග මෙහි සංගීත නිර්මාණයට සම්බන්ධව තිබෙනවා. චිත්‍රපටයේ වේශ නිරූපණ ශිල්පියා වශයෙන් කටයුතු කර තිබෙන්නේ මනුක දිල්ශානුයි. පසු නිෂ්පාදනය ARC Cinema විසිනි.

Written by Kavinu Weerakkody