රොබෝවරියක හා පෙමින් බැඳෙන තරුණ විද්‍යාඥයෙක්

Shahid Kapoor බොලිවුඩයේ දෙවන පෙළ රංගන ශිල්පීන් ලැයිස්තුවෙ හි සිටින ප්‍රධානම තරුවක් වුණත්, ඔහුගේ ඉදිරි නිර්’මාණ කටයුතු ගැන තොරතුරු යාවත්කාලීන වන්නේ බොහොම අඩුවෙනුයි. එමෙන්ම, පසුගිය වසර කිහිපය වන තුරුම Shahid වටා බොලිවුඩයේ එතරම් ස්ථාවර (solid) රසිකයින් පිරිසක් සිටියේත් නැහැ. නමුත් 2018 වසරේදී තිරගත වුනු Padmaavat සහ 2019 වසරේදී තිරගත වුනු Kabir Singh චිත්‍රපටවලින් පසු ඔහුට ඉන්දියාව පුරාම සැලකිය යුතු ප්‍රේක්ෂකයින් පිරිසක් ආකර්’ෂණය වුනා.

සුප්‍රකට අධ්‍යක්ෂක සන්ජේ ලීලා බන්සාලිගේ අධ්‍යක්ෂණයක් වන Padmaavat ඉන්දීය කෝටි 500කට අධික ආදායමක් රැස් කරගන්නට සමත් වුනු අතර, සන්දීප් රෙඩ්ඩි අධ්‍යක්ෂණය කළ Kabir Singh හි රංගනය වෙනුවෙන් Filmfare Awards හි හොඳම නලුවාට නිර්’දේශ වීමට ද Shahid Kapoorට හැකියාව ලැබුනා.
එවැනි චිත්‍රපටවලින් ඔහු එකදිගට ලබා ගත් සාර්ථකත්වය නිසාම ශාහිඩ්ගේ ඊළඟ නිර්’මාණය වූ Jersey සිනමාපටයත් ආදායම් වාර්තා බිඳ හෙලමින් ප්‍රදර්’ශනය වනු ඇතැයි බොහෝ රසිකයින් බලාපොරොත්තු තබා ගත්තා. නමුත් කිසිවෙකු නොසිතූ පරිදි Jersey චිත්‍රපටය, එම වසරේ අසාර්’ථකම සිනමාපට ගොන්නට එකතු වුනේ ඉන්දියානු කෝටි 30කටත් අඩු ආදායමක් රැස් කරගනිමිනුයි…

Jersey චිත්‍රපටයෙන් පසු ඔහු Raj – DK අධ්‍යක්ෂකවරුන් දෙදෙනාගේ “Farzi” නැමැති නවතම වෙබ් කතාමාලාවට සම්බන්ධ වූ අතර එහිදී ඔහු රඟපෑවේ ප්‍රසිද්ධ දමිළ නලුවෙකු වන Vijay Sethupathi සමඟිනුයි. Amazon Prime ඔස්සේ නිකුත් වූ Farzi වෙබ් කතාමාලාව රසිකයින්ගේ අතිශය ප්‍රසාදයට ලක් වුනු අතර ඊට ධනාත්මක විචාර ප්‍රතිචාරත් නොමදව ලැබුනා.

Farzi කතාමාලාවට පසුව Shahid Kapoor රංගනයෙන් එක්වන නවතම සිනමාපටයෙ හි අලුත් විස්තර රැසකුත් දැන් මාධ්‍යයට නිරාවරණය වී තිබෙනවා. මේ ආකාරයට Shahid Kapoor නැවතත් චිත්‍රපට රංගනය සඳහා පිවිසෙන්නේ වසරක නිහැඬියාවකින් පසුවයි.

ඒ අනුව මෙවර ඔහු ගිවිසුම්ගත වී තිබෙන්නේ Dinesh Vijayan හිමිකාරීත්වය දරන Maddock Productions නිෂ්පාදන ආයතනය සමඟයි. Dinesh Vijayan හා Shahid Kapoor එක්ව නිර්’මාණය වන සිනමාපටයක් ගැන කලක සිටම බොලිවුඩයෙන් තොරතුරු පළ වුනත්, ඔවුන් දෙපාර්ශවයෙන් කිසිදු අයෙක් ඒ ගැන මෑතක් වනතුරුම ප්‍රසිද්ධියේ අදහස් දැක්වූයේ නැහැ. නමුත් දැනට මාස කිහිපයකට පෙර එම චිත්‍රපටයේ පළමු පූර් ව ප්‍රචාරක පෝස්ටරය මාධ්‍යයට නිකුත් කළ අතර තවමත් එම චිත්‍රපටයට නිශ්චිත නමක් (title) යෝජනා වී නැහැ.

පසුගිය වසර අග භාගයේදී රූපගත කිරීම් ඇරඹි මෙහි ප්‍රධාන දර්ශන තල ලෙස තෝරාගෙන තිබුනේ උතුරු ඉන්දියාවේ දිල්ලි සහ මුම්බායි ප්‍රදේශයි. ඊට අමතරව ගීත සහ සෙසු දර්’ශන කිහිපයක් සඳහා විදෙස් රටවල් කිහිපයකදී මෙම චිත්‍රපටයේ රූපගත කිරීම් සිදු කොට තිබුනා.

Romance ශානරයට අයත් චිත්‍රපටයක් වුවත්, නිෂ්පාදක කණ්ඩායම විස්තර කරන අන්දමට මෙහි කතා සාරාංශය ගොඩ නැඟී තිබෙන්නේ සාමාන්‍ය ආදර කතාවකට සීමා නොවුනු මාතෘකාවක් වටායි. Romantic Comedy චිත්‍රපටයක් වුවත්, මෙය මින් පෙර හින්දි සිනමාව තුළින් නොදුටු අන්දමේ Rom Com සිනමාපටයක් බවයි පැවසෙන්නේ. එනම් මෙම චිත්‍රපටයට පාදක වන්නේ රොබෝවරියක් සහ මනුෂ්‍යයෙකු අතර සිදු වන සිද්ධි දාමයක්! ඔහු සහ එම රොබෝවරිය අතර හටගන්නා ආදර සම්බන්ධතාවයක් පාදක කරගෙන නිර්’මාණය වන මෙය Robot Rom-Com ගණයේ චිත්‍රපටයක් බවටයි අන්තර් ජාලයේ සඳහන් වන්නේ.

ෂාශිඩ් කපූර් විසින් නිරූපණය කිරීමට නියමිතව තිබෙන්නේ රොබෝ තාක්ෂණික ආයතනයක සේවය කරන රොබෝ විද්‍යාඥයෙකුගේ චරිතයකුයි. ඔහු හා පෙමින් බැඳෙන රොබෝවරියගේ චරිතය නිරූපණය කරන්නේ ජනප්‍රිය රංගන ශිල්පිනී Kriti Sanon විසිනුයි. ශාහිඩ් සහ ක්‍රිති මින් පෙර කිසිදු චිත්‍රපටයක එක්ව රඟපා නැහැ. මේ ඔවුන් දෙදෙනාගේ සුසංයෝගයෙන් බිහි වන පළමු සිනමාපටයයි.

ඔවුන් දෙදෙනාට අමතරව බොලිවුඩයේ ප්‍රවීණ රංගන ශිල්පීන් දෙපළක් වන Dharmendra සහ Dimple Kapadia ද මෙහි වැදගත් චරිත නිරූපණය කරනවා. චිත්‍රපටයේ කතා තේමාව ගැන වැඩිදුර විස්තරයක් අණාවරණය වී නැතත්, මෙම ශානරයෙන් බොලිවුඩය තුළ නිෂ්පාදනය වන පළමු සිනමාපටය ලෙස හැඳින්වෙන්නේ මෙයයි. චිත්‍රපටයේ වෙනස් බව නිසාම මෙහි රූගත කිරීම් ඇරඹීමට පෙර නිෂ්පාදක කණ්ඩායම විසින් Shahid සහ Kritiගේ සහභාගීත්වයෙන් රංගන පුහුණුවීම් කිහිපයකුත් පවත්වා තිබෙනවා.

රංගන ශිල්පිනී Kriti Sanon අවසන් වරට සම්බන්ධ වූ Mimi සහ Hum Do Hamare Do සිනමාපට ද්විත්වය නිෂ්පාදනය කළේද දිනේෂ් විජයන් වීමත් විශේෂත්වයක්. එමෙන්ම Mimi චිත්‍රපටයේ ඇය දැක්වූ විශිෂ්ට රංගනය වෙනුවෙන් “හොඳම නිළියට හිමි Filmfare සම්මානය” දිනා ගැනීමටත් Kriti Sanonට හැකියාව ලැබුනා. ඒ ඇය හොඳම නිළියට හිමි ෆිල්ම්ෆෙයා සම්මානයක් දිනා ගත් පළමු අවස්ථාවයි.

ස්වතන්ත්‍ර නිර්’මාණ සහ තරුණ සිනමාකරුවන්ට නිසි අවධානයක් ලබා නොදී, තරු පවුල්වල (Star Kids) සාමාජිකයින්ට සහ වෙනත් භාෂාවල ප්‍රතිනිර්මාණවලට නිරන්තර අවස්ථාවන් ලබා දෙන්නේ ඇයි දැයි යන්න පසුගිය කාලය පුරාවටම බොලිවුඩ් සිනමා කර්මාන්තයට එල්ල වී තිබුනු චෝදනාවක්. රසිකයින් විසින් මෙම ගැටළුව මතු කළේ, තරුණ චිත්‍රපටකරුවන්ගේ ගුණාත්මක තිර පිටපත්වලට අවස්ථා ලබා නොදී බොලිවුඩයේ ප්‍රධාන නිෂ්පාදන ආයතන සියල්ලම පාහේ දකුණු ඉන්දියානු remakesවලට මුල් තැන ලබා දීම නිසායි.

බොලිවුඩයේ බොහෝමයක් ප්‍රධාන නිෂ්පාදන ආයතන අඩු මුදලකට ලබා ගත් remake rights මඟින් දිගින් දිගටම වෙනත් භාෂාමය චිත්‍රපට හින්දියට ප්‍රතිනිර්’මාණය කළත් Dinesh VIjayanගේ Maddock Films චිත්‍රපට නිෂ්පාදන ආයතනය මුල සිටම ඒ පිළිවෙත අනුගමනය කළේ නැහැ. ඔවුන් සැමවිටම පාහේ තරුණ අධ්‍යක්ෂකවරුන්ගේ original scripts සඳහා අවස්ථාවන් ලබා දුන් අතර ඒ හරහා නවකයින් විශාල ප්‍රමාණයකට හින්දි සිනමා ක්ෂේත්‍රයට ඇතුල් වීමටත් අවස්ථාව උදා වුනා.

Raabta (2017) හින්දි චිත්‍රපටය අධ්‍යක්ෂණය කළ Dinesh Vijayan හිමිකාරීත්වය දරන මෙම Maddock Films සමාගම අද බොලිවුඩයේ තිබෙන ප්‍රධානම සිනමා නිෂ්පාදන ආයතන අතුරින් එකක්. Badlapur, Hindi Medium, Stree, Mimi, Love Aj Kal වැනි අතිශය ජනප්‍රියම චිත්‍රපට සියල්ලම නිෂ්පාදනය කළේ මෙම Maddock Films ආයතනය හරහායි. සැමවිටම පාහේ එකිනෙකට විවිධත්වයක් සහිත චිත්‍රපට නිෂ්පාදනය කිරීමත්, තිර පිටපතේ ගුණාත්මකබාවය පිළිබඳව සැලකිලිමත් වීමත් නිසා මේ වනවිට Maddock Films වටා ඊට ම අනන්‍ය වූ ප්‍රේක්ෂකාගාරයක් බිහිවී තිබෙනවා.

Maddock Productions ආයතනය නිවේදනය කළ පරිදි ඔවුන්ගේ සිනමා ඉතිහාසයේ මෙතෙක් නිෂ්පාදනය කෙරෙන දැවැන්තම ආදර කතාව වන මෙහි නිෂ්පාදන පිරිවැය නිශ්චිතව නිවේදනය කර නැතත් ආසන්න වශයෙන් ඉන්දීය කෝටි 60-80 අතර මුදලක් ඔවුන් විසින් මීට ආයෝජනය කර ඇතැයි සඳහන් වනවා. ඊට හේතුව වන්නේ Maddock Productions දැනට නිෂ්පාදන කළ චිත්‍රපට අතුරින් දැවැන්තම Romantic චිත්‍රපටය ලෙසට හැඳින්වෙන Love Aaj Kal 2 (2020) හි නිෂ්පාදන පිරිවැය වන්නේ ඉන්දීය කෝටි 40කට ආසන්න මුදලක් වීම නිසායි.

2005 වසරේදී ඇරඹුනු Maddock Productions නිෂ්පාදන සමාගම සිය සිනමා ගමන ආරම්භ කරන්නේ Saif Ali Khan රඟපෑ Being Cyrus බොලිවුඩ් චිත්‍රපටයෙනුයි. මූල්‍යමය වශයෙන් වාසි සහගත ආදායමක් අත් කරගැනීමට නොහැකි වුනත් ධනාත්මක විචාරක ප්‍රතිචාර රාශියක් හිමි කරගන්නට එය සමත් වූවා. එතැන් පටන් Love Aaj Kal, Agend Vinod, Cocktail, Goa Gone ආදී සිනමාපට කිහිපයක්ම ඔවුන් නිෂ්පාදනය කළ අතර ඒ සියල්ලකම පාහේ ප්‍රධාන චරිතය නිරූපණය කළේ ද Saif Ali Khan විසිනුයි.

Badlapur, Luka Chuppi, Bala, Stree, Mimi, Shiddat වැනි එකිනෙකට වෙනස් – විවිධ චිත්‍රපට සඳහා මුදල් ආයෝජනය කිරීමට ඔවුන් පෙළඹෙන්නේ ඉන් අනතුරුවයි. ඔවුන් නිෂ්පාදනය කළ Hindi Medium නැමැති බොලිවුඩ් චිත්‍රපටයට ඒ අතුරින් සුවිශේෂී ස්ථානයක් හිමිවනවා. එය හැඳින්වෙන්නේ මෙතෙක් ඉන්දියානු සිනමාවෙන් බිහිවූ විශිෂ්ටතම සිනමා කෘතියක් ලෙසයි. Irfan Khan ප්‍රධාන චරිතය නිරූපණය කළ එම සිනමාපටය Saket Chaudharyගේ අධ්‍යක්ෂණයක්. ඉන්දියානු කෝටි 15ක නිෂ්පාදන පිරිවැයට එරෙහිව ඉන්දියානු කෝටි 322ක ආදායමක් රැස් කර ගනිමින් දැවැන්ත බොක්ස්-ඔෆිස් සාර්ථකත්වයක් මෙන්ම, 63වන Filmfare උළෙලේදී හොඳම චිත්‍රපටය හා හොඳම නළුවාට හිමි සම්මාන ද්විත්වය දිනා ගැනීමටත් ඊට හැකියාව ලැබුනා.

එවැනි විශිෂ්ට ගණයේ චිත්‍රපට නිෂ්පාදනය කරමින් මේ දක්වාම සාර්’ථක ගමනක් පැමිණ තිබෙන Maddock Productions හි විසි පස්වන නිෂ්පාදනය වන්නේ Shahid Kapoor රඟපාන මෙම නවතම සිනමාපටයයි.

මෙම චිත්‍රපටය Amit Joshi සහ Aradhana Sah දෙදෙනාගේ සුසංයෝගයෙන් අධ්‍යක්ෂණය කෙරෙන අතර තිර පිටපත රචනා කර තිබෙන්නේ ද ඔවුන් දෙදෙනා විසිනුයි. Amit Joshi සහ Aradhana Sah දෙදෙනාම මෑතකාලීන බොලිවුඩ් සිනමාවේ ජනප්‍රියත්වයට පත්වුනු හින්දි සිනමාපට කිහිපයකම තිර පිටපත් රචනා කළ දක්ෂ – තරුණ සිනමාකරුවන් දෙදෙනෙක්. තිර රචකයින් ලෙසින් ක්ෂේත්‍රයේ ස්ථාවරත්වයට පත්ව සිටියත් Amit සහ Aradhana දෙදෙනාම මින් පෙර චිත්‍රපට අධ්‍යක්ෂණයට පිවිස තිබුනේ නැහැ. මෙය ඔවුන් දෙදෙනාගේම පළමු සිනමා අධ්‍යක්ෂණයයි.

කලකට පෙර ඉන්දියාවේ කතාබහට ලක්වූ Trapped නැමැති සිනමාපටයත්, මෑතකදී රසිකයින්ගේ ආකර්ෂණය දිනා ගත් Babli Bouncer සිනමාපටයත් Amit Joshi විසින් රචනා කළ චිත්‍රපටයි. Amit Joshi විසින් සිය පළමු වෘතාන්ත සිනමාපටය අධ්‍යක්ෂණය කිරීමට නියමිතව තිබුනේ 2020 වසරේදී වුවත්, විවිධ හේතූන් නිසා එය අතරමඟ නතර වුනා. මෙහි වැඩ කටයුතු අවසන් වීමෙන් පසුව බොලිවුඩ් නලු Vikrant Massey රඟන සිනමාපටයකුත් ඔහු විසින් අධ්‍යක්ෂණය කිරීමට නියමිතයි.
Mumbaikar, India Lockdown සහ Babli Bouncer නැමැති සිනමාපට ත්‍රිත්වයෙ හි රචකයා වන්නේ Aradhana Sahයි.

එළඹෙන දෙසැම්බර් 07 වනදා සිට ලෝ පුරා සිනමාහල්වලදී මෙය තිරගත වීමට නියමිතයි!!!

Written by Kavinu Weerakkody