තාත්තා – දෙරණ LUX සිනමා සම්මාන 2024

09වන දෙරණ LUX සිනමා රාත්‍රිය සඳහා තෝරාගත් 2023 වසරේ තිරගත වුනු චිත්‍රපට අතරට එක් වූ, තවත් ජනකාන්ත නිර්මාණයක් වන්නේ තාත්තා සිංහල සිනමාපටයයි.

පසුගිය වසරේ දෙසැම්බර් මාසයේදී තිරගත වීම ඇරඹුනු තාත්තා සිනමාපටය ප්‍රසාද් සමරතුංගගේ අධ්‍යක්ෂණයක්. මෙරට ළමා පරපුර ඉලක්ක කොටගෙන නිපදවුනු මෙම චිත්‍රපටය තුළින් විස්තර වන්නේ ත්, ඈත ගම්මානයක දඩබ්බර දරුවෙකු සහ ඔහුගේ පියා අතර සංවේදී කතා පුවතකුයි.

රුවන් වයස අවුරුදු දහයක දරුවෙක්. නිරන්තරයෙන්ම දඩබ්බර වැඩ කරන නිසා ඔහුගේ පියා ඔහුට නිතරම පහර දෙනවා. පියාගේ මෙම පහරකෑම් ඉවසා ගන්නට නොහැකි වුනු රුවන්, එයින් ගැලවෙන්නට එක්තරා දඩබ්බර ක්‍රියාවක් සිදු කරනවා. නමුත් ඔහු කළ ක්‍රියාවේ බරපතලකම රුවන්ට තේරුම් යනකොට බොහෝමයක් දේවල් සිදු වී අවසානයි…

තාත්තා චිත්‍රපටයේ ප්‍රධාන චරිතය වන රුවන්ගේ පියා, රත්නපාලගේ භූමිකාව රඟපාන්නේ මෙරට සිටින ජනප්‍රිය නලුවෙකු වන කුමාර තිරිමාදුර යි. ඊට අමතරව නිල්මිනි තෙන්නකෝන් – සිනෙති අකිලා – තිසෙවි සත්සිලු – ඔනෙලි හිමහංසි – උපුල් නිශාන්ත – සැනට් දික්කුඹුර – උපුල් වීරසිංහ වැනි පිරිසක් මෙම චිත්‍රපටයේ සෙසු චරිත සඳහා රංගනයෙන් එකතු වනවා.

තාත්තා චිත්‍රපටයේ අධ්‍යක්ෂණය මෙන්ම තිර පිටපත් රචනය සිදු කර තිබෙන්නේ ද ප්‍රසාද් සමරතුංග විසිනුයි. තිර පිටපත රචනයට ලලිත් වර්ණප්‍රියත් සහාය වී තිබෙනවා. ප්‍රසාද් සමරතුංග විසින් මීට පෙර ඉස්කෝලෙට මන් ආවා යනුවෙන් තවත් ළමා චිත්‍රපටයක් අධ්‍යක්ෂණය කළ අතර එය මෙරට බෙහෙවින් ජනප්‍රියත්වයට පත් වුනා. මෙය ඔහුගේ දෙවන සිනමා අධ්‍යක්ෂණයයි.

සිසිකිරණ පරවිතාන චිත්‍රපටයේ කැමරාකරණය සිදු කළ අතර සංස්කරණය ශාන් අල්විස් විසිනි. දිනේෂ් සුබසිංහ මෙහි සංගීත අධ්‍යක්ෂකවරයායි.

තාත්තා චිත්‍රපටය පමණක් නොවෙයි, පසුගිය වසරේදී දිවයින පුරා තිරගත වූ තවත් මෙවැනිම සිනමාපට 30කට අධික සංඛ්‍යාවක් මෙවර දෙරණ Lux සිනමා උළෙලෙ හි තරඟකාරී අංශය යටතේ නිර්දේශ වී තිබෙනවා.

මේ සෑම නිර්මාණයක්ම ඔබගේ ප්‍රියතම නලු නිළියන්, කලාකරුවන් සම්බන්ධ වූ ජනප්‍රිය සිනමාපටයි!

එනිසාම, ඔබේ මෙම ප්‍රියතම සිනමාපට තවත් ඔබට සමීප කිරීමේ අරමුණින් විශේෂ රූපවාහිනී වැඩසටහන් මාලාවකුත් ඔබට තිළිණ කරන්නට අප සූදානම්…

මෙරට ජනකාන්ත නලු නිළියන් – සිනමාකරුවන් රැසක් සම්බන්ධ වන මෙම විශේෂ සිනමා සාකච්ඡාමය වැඩසටහන් මාලාව, සෑම සෙනසුරාදා දිනකම හවස 3.30ට TV දෙරණ ඔස්සේ ඔබට නැරඹිය හැකියි.

09වන දෙරණ LUX සිනමා උළෙලෙ හි ජයග්‍රාහී සිනමාපටවලට සම්මාන ලබා දෙන අති – උත්කර්ෂවත් සම්මාන රාත්‍රිය එළඹෙන නොවැම්බර් 16 වනදා සවස 7.30ට TV දෙරණ ඔස්සේ නැරඹිය හැකියි.

Written by Kavinu Weerakkody